Torsdag 14. november var det duka til pensjonistmøte i Kjellarstova av Eidsdal og Norddal pensjonistlag.
Der var 35 personar som møtte opp. Og Nabolaget mjuka opp stemninga med «Når lysene tennes der hjemme», nydeleg musikk, eg får julestemning
Wenche ønskte velkomen til alle, det er alltid kjekt å sjå folk som smilar og er blide, og det er alle på våre tilstellingar.
Det fyrste vi måtte gjere var å tenne lys for to sambygdingar som hadde gått bort sidan sist vi var samla.
Wenche las eit dikt av Stein Roger Olsen, og så song ho «…noen kommer noen går…»
Så måtte vi ha litt musikk. Det var kome to nye dragspel hos Nabolaget. Du godaste for ei prakt og for ein lyd! Måtte ta bilete av herlegdomen, vonar det kom med i avisa.
Dagens gjest var Sigmund Rødal frå Ålesund. Han er leiar i Spjelkavik og omegn pensjonistlag .
Han er ein kunnskapsrik mann på mange felt, og lovar, reglar og rettar for pensjonistar kan han. Han snakka mykje om dette, vil sende utskrift til oss, slik at eg kan kopiere til dei som ynskjer . han snakka om fullmakter, som det er tre typer av: 1 – framtidsfullmakt, 2 – legalfullmakt og 3 – vedvarande fullmakt (forvaltningslova). Sigmund har sjølv utarbeidd vedvarande fullmakt, og den virkar.
Han var også innom helse- og omsorgssaker, kva kommunane er pålagt, kva vi kan krevje, kva dei skal tilby oss på sjukeheimar, kva pårørande har krav på osv… Trur eg stoppar der. Det vart nokre interessante minuttar han baud på, det er mykje vi ikkje veit om rettane vi har, så det luraste er å lese seg opp sjølv. Han var open for spørsmål, og det var det mange som nytta seg av.
Meir musikk fekk vi, valsar og gamle slagerar. Matøkta sto for døra, varme karbonadesmørbrød. Vidare kom ei herskare av nydelege kaker på bordet, vi gjekk ikkje svoltne heim frå dette møtet. Åresalet gjekk strålande, med matnyttige gevinstar.
Det vart utlevert tilbod frå Hurtigruta og det var fleire som likte. Dette er ikkje i Pensjonistlagets regi, men privat.
Det er kome inn ynskje om endring av namn, og det må avgjerast før årsmøtet.
Wenche las eit dikt, på sjukeheimen i 2035, om robot-dame og kunstig intelligens.
Avslutning med musikk. Vel heim alle saman.
Helsing oss damene
