I helga har heile Storfjordnytt-redaksjonen vore på landsmøte i Landslaget for lokalaviser (LLA) i Trondheim. Det er alltid nyttig å delta på slike samlingar, særleg for ein bitte liten redaksjon som vår. Det er den eine gongen i året vi har høve til å treffe folk som driv med det same som oss, og det er eit fint høve til å få mykje godt fagleg påfyll. For det treng vi alle!
Det er utruleg mange dyktige avisfolk rundt om i landet, og dei aller dyktigaste er to små redaksjonar, det viste kunngjeringa av «årets lokalavis». Prisen er delt i to; éin for aviser med færre enn 4000 abonnentar og éin for aviser med fleire abonnentar. Fjell-Ljom som held til på Røros, vart årets lokalavis for dei med færre enn 4000 abonnentar. Og supergledeleg var det at våre gode naboar og kollegaer i Nyss vart kåra til årets lokalavis for dei med fleire enn 4000 abonnentar! Det er berre å bøye seg i støvet og gratulere.
Prisane viser at ein treng ikkje vere stor og ha mykje ressursar for å lage ei god lokalavis. Det handlar om struktur og kreativitet og evne og vilje til å gjere jobben som må til. Det har gjengen i Nyss gjort til gagns! Juryen seier mellom anna at Nyss er ei avis som både engasjerer, informerer og byggjer fellesskap – i tillegg til at dei ikkje er redde for å finne på litt sprell og moro. Dette kan vi la oss inspirere av – og gratulerer så mykje til naboane våre, prisen er vel fortent!
